Arthur
We am Sunntig d’Glogge lüte weiss i, was das het z’bedüte
D’Chilche isch für alli da drum darf i da o ine gah
Dä Chilcheruum isch wunderschön u d’Chilchebänk si sehr bequem
Es Chüssi het’s uf jedem Platz äxtra für mi – für d’Chilche-Chatz
Orgelemusig han i gärn mängisch dräiht sogar e Stärn
Wunderbari Tön erklinge we d’Kantorei tuet Lieder singe
i singe ab u zue mal mit de sperr i ds Schnörrli uf – ganz wit!
Scho mängi Predigt han i ghört u i dere Zyt nie gstört
Es intressiert mi, was sie säge über Gott u d’Wält u ds Läbe
Ds Gheimnis Gott isch wunderbar das isch üs Tier scho längschtens klar
no meh verrate tüe mir nüt doch gloubet mir, dir liebe Lüt
mit Hoffnig, Liebi u chli Muet chunnt schlussändlech alles guet
We ne Mönsch e Chummer het u mi gärn chli strichle wett
de tue ni o gärn häre ha wen i dermit ihn tröschte cha
D’Könige us em Morgeland si mi cho bsueche mitenand
Kostbari Gschänk hei si mitbracht doch leider nüt wo Fröid mir macht
si hei mi lieb la witer pfuuse u si de still zur Chilche use
Vorusse lig i gärn ar Sunne u trinke Wasser geng vom Brunne
O bim alte Sigristehus gah ni öppe i und us
Vo hie het me dr schönschti Blick u de machts aube «klick-klick-klick»
we si tüe es Foto schiesse die wo hie tüe d’Ussicht gniesse
Tourischte us allne Herre-Länder fötele mi uf dr Muur bim Gländer
i bi e berüehmte Chatze-Ma ke kennt mi vo Asie bis Amerika
Itz heit dir viel vo mir vernoh u we dir mal weit z’Predig cho
de bin i villecht o scho dert im ne Eggeli ganz diskret
Häbet’s guet – i säge tschau! mit em e härzleche «Miau!»
Öie Chilche-Kater
Arthur
Februar 2025/Iris Kocher/Olivia Schüpbach (Text und Fotos) und Franziska Gerber (Fotos)